Commentary

Mamona o Aganuu Eseese

Opomauina o eseesega faaleaganuu ma le faafaileleina o le lotogatasi

O Le Ekalesia a Iesu Keriso o le Au Paia o Aso e Gata Ai o se faalapotopotoga malosi ma le ola o le faatuatua i le lalolagi atoa lea e 15 miliona tagata i le silia ma le 160 atunuu. O Mamona e fai ma sui o aganuu eseese, tautatala i le tele o gagana eseese, ma e o mai i talaaga tulaga ese faaletagata lava ia.

Sa faamatalaina talu ai nei e Peresitene Dieter F. Uchtdorf, le fesoasoani lua i le Au Peresitene Sili o le Ekalesia ma o ia foi o se Siamani, lenei eseesega “o se malosiaga o lenei ekalesia,” ma ta’u atu i le Au Paia o Aso e Gata Ai i le lalolagi, “matou te manaomia a outou taleni ma manatu tulaga ese.”

O se tasi o luitau faigata tele o le Ekalesia o le opomauina lea o lenei eseesega o aganuu ma gagana eseese i totonu o ona tagata auai ae i le taimi lava e tasi o loo atiina ae ai le lotogatasi. E le o se mea fou lenei mea. Na tusi atu le aposetolo o Paulo i tagata o le Ekalesia i le aai anamua o Efeso i le 2,000 tausaga ua mavae: “E le toe tagata ese outou, po o e ua aumau, a ua nuu faatasi ma le au paia, o le aiga foi o le Atua. (Efeso 2:19). I le tele o seneturi, o soo se tapuaiga lava e saili e fausia moni se mau i le atulaulau, sa le o se faatuatuaga faaleituaiga pe faaleitulagi, sa ao ona fetuutuunai se ala e faapaleni ai le alofa o le tagata patino ma le lelei o le vaega atoa.

O le amataga o le Faa-Kerisiano e masalo o le suesuega muamua ma sili ona lelei lea i lenei galuega. O le faamatalaga o le Potu o Talafou a Mamona, ‘O Talitonuga Mautu FaaMamona e uiga i Faalapotopotoga,’ ua maua ai le manatu e faapea “I le tele o tulaga, o le olaga Faa-Mamona i totonu o nuu e taulamua lava i le faataitaiga o le Faa-Kerisiano mai le amataga. O lena nuu o le Au Paia sa latou faatusatusaina o latou itutino soofaatasi i le ‘tino o Keriso.’ A o galulue faatasi lelei ia vaega eseese o le tino, o lea e saofaga ai tagata taitoatasi i le vaega atoa. Ua faapena foi i le Au Paia o Aso e Gata Ai.”

Aapa Atu i le Lalolagi Atoa ma le Fausiaina o Nuu

Talu ona faatulagaina Le Ekalesia a Iesu Keriso o le Au Paia o Aso e Gata Ai i nuu maotua o Amerika i Matu i le 1830, ua aapa atu pea ona tagata i le lalolagi atoa faatasi ai ma se manao e fausia ni nuu faatuatua malolosi ma lotogatasi. I le taimi nei, e mafai ona maua Mamona i le lalolagi atoa. I atunuu taitasi, e opomauina e le Au Paia o Aso e Gata Ai ma faapelepele i a latou lava aganuu, ae faailoa mai ai foi le tasi o i latou e ala i le talalelei e tasi a Iesu Keriso.

E lua ni fuaitau faatusitusiga paia ua faatulaga ai le agaga o lenei auala: “Ma o lenei ou te fai atu ia te outou e oo mai le taimi o le a folafola atu ai le olataga a le Alii i atunuu uma, ituaiga, gagana, ma nuu. (Tusi a Mamona, Mosaea 15:28). O le faitauina o lenei mea faatasi ma le valaaulia a Paulo i tagata Efeso ua faalauiloa ai le auala Faa-Mamona o le aapa atu i le lalolagi atoa ma le faalaugatasia o nuu ma malo.

Tuuina Atu o Auaunaga a le Ekalesia ma Punaoa, ma Valaaulia e Auai

O faapefea la ona tuuina atu e le Ekalesia ana aoaoga ma auaunaga i ona tagata e matua eseese lava aganuu ma gagana? E faapefea ona ia faaaofia ona tagata e auai i tapuaiga ma avea ma soo i faapotopotoga ua faatoateleina o le mau aganuu eseese? Ma e faapefea ona ia ausiaina le lotogatasi tutusa lea e manino i faapotopotoga o aganuu eseese ma gagana eseese a Mamona mai Hong Kong i Lonetona, ma Accra i Sini?

E amata i le iloiloina pea lava pea o manaoga o ona faapotopotoga ma tagata taitoatasi. O loo i ai se naunautaiga i le pitolaau a taitai o le Ekalesia, i le lalolagi atoa ma le lotoifale, e tuuina atu le savali o le talalelei i tagata uma e finagalo e taliaina, ma ia valaaulia foi ma faafaigofie le auai ma le mauaa atoatoa i le talalelei i le pitolaau a tagata taitoatasi lava ia.

E faia e le Ekalesia se galuega ofoofogia i le talanoaina o lenei luitau tele o le aoaoina atu o le talalelei ma le faaauai o ona tagata i tapuaiga e taulai atu ia Keriso atoa ai ma isi gaoioiga i le tele o tulaga faaleaganuu ma gagana e silia ma le selau. O le tasi o auala o le tuuina atu lea o punaoa a le ekalesia i gagana e ese mai le gagana Peretania, lea o loo faatinoina pea e le matagaluega faaliliu a le faatuatuaga talu mai le 1946.

O le taimi nei o loo lolomiina e le Ekalesia ia punaoa e silia ma le 100 gagana. I le taimi o konafesi aoao faaleafatausaga a le faatuatuaga, e tuuina atu ai faaliliuga i gagana e 96 mo tagata auai i le taimi tonu o faasalalauga tuusao. Pe tusa ma le 800 ni faamatalaupu ma volenitia e manaomia e tuuina atu lenei auaunaga. O faaliliuga o taualumaga o konafesi e maua i luga o le initoneti, i mekasini a le Ekalesia, The Ensign ma Le Liahona, i luga o DVD ma isi mamanu. E mafai e se tagata e tautala Faa-Farani i Niu Kaletonia ona faitau, matamata pe faalogologo i nei sauniga i lana gagana muamua. E mafai foi e tagata Kenya, Monokolia, Peru ma le faitau miliona o isi e tautatala i le tele o isi gagana. Ua faaliliuina le mekasini o Le Liahona i gagana e 47 i masina taitasi. O loo i ai savali mai taitai o le Ekalesia faapea foi ma isi tusiga o loo taulai atu i le faamalolosia o tagata taitoatasi, aiga ma nuu.

O se tasi o uiga tulagaese o le polokalama faafaifeautalai a le Ekalesia i le lalolagi atoa o le maualuga o le mataalia tele o le polokalama o le aoaoina o gagana lea e faaaogaina i nofoaga autu a le Ekalesia e aoao ai faifeautalai. E i ai gagana e 50 o loo aoao atu i faifeautalai fou i le Nofoaga Autu e Aoao ai Faifeautalai i Provo, Iuta. O i latou e feiloai i faifeautalai e masani lava ona maofa i le lelei o lo latou tautatala i le gagana i le lotoifale.

O Le Fausiaina o se Aganuu se Tasi Faale-Talalelei

I tulaga faaletagata lava ia ma faapotopotoga, e iloilo ai pea i taimi uma e taitai o le Ekalesia i le lotoifale ia manaoga o le Au Paia o Aso e Gata Ai i totonu o tuaoi o la latou tausiga. O le mea o loo latou taumafai e fai o le fatuina lea o se aganuu e tasi o le lotogatasi faaletalalelei ia i ai e avea o se faamalu mālū i luga ae o le tele o isi aganuu mauoa ma tu ma aga e laugatasia ai tagata Mamona. O nei sini faamoemoeina e lē faatautavā i le tasi ma le isi. O lenei ituaiga o tausiga faaleoleo mamoe e taulai atu i manaoga faaleagaga faapea foi ma manaoga faaletino. A o matele ina fauina o tatou ituaiga o tagata i aganuu ma gagana, o pogai faaleaganuu ma faalegagana e taua tele le iloiloina. O le taliaina o le talalelei a Iesu Keriso e le manaomia ai ona tatou lafoai ese mea e fauina ia ituaiga tagata e i ai i tatou pe afai e le feteenai ma mataupu faavae na aoaoina mai e Keriso.

I le iuga, o se mataupu tau i le paleni ma le nofouta lelei. O tagata taitoatasi o le Ekalesia—e tusa lava pe matua, faaleogalua pe talavou—ua i ai aafiaga tulaga ese ma manaoga. O nisi o tagata matutua Samoa i Brisbane, mo se faataitaiga, e manaomiaina se fesoasoaniga mo le gagana pe a latou auai i sauniga a le ekalesia, aua o le gagana Peretania e le o sa latou gagana muamua. Ae o loo matuai nofouta foi lava nei tagata matutua i manaoga o a latou fanau ma fanau a fanau e tusa ai ma tomai faa-Peretania. Latou te iloa o le tomai faa-Peretania e taua mo a latou fanau a o latou tulitulimatagauina a latou aoaoga ma matata i se atunuu fenanui. Ma le isi, e toatele tagata Samoa e iloaina le taua tele o le puipuia o se alofa ma le tomai i le gagana Samoa ma le aganuu, i le autalavou ma tamaiti. I le talanoaina o lenei mataupu o le paleni, o loo i ai se manaoga lea o loo i ai pea i le taimi nei mo faaiuga lelei, nofouta, onosai ma le agalelei.

O loo i ai foi se manaoga mo le fetuutuunai. Mo se faataitaiga, afai e auai se tagata Toga i se faapotopotoga e faatautaia ai sauniga tapuai i le gagana Peretania, ma afai e faatapulaaina lona tomai faa-Peretania, o le a maua ni auala e fesoasoani ai ia te ia i lona tapuai faatasi ai ma ona uso a tagata o le Ekalesia. E mafai ona ofoina atu le faaliliuga. E mafai ona faatulagaina se vasega Faa-Toga o le Aoga Sa pe afai o loo i ai isi o le a manuia foi mai lenei mea. Afai e lauga mai o ia mai le pulelaa, pe faia se tatalo i se sauniga, atonu o le a sili atu ona mafanafana e tautala atu pe tatalo i le gagana Toga. I nisi nofoaga, pe afai o loo i ai se manaoga malosi i le lotoifale, e faatulagaina ni faapotopotoga o isi gagana. E tusa lava po o le a le auala ua masani ai, o le faamoemoega lava ia faamanuiaina ai tagata taitoatasi, aiga ma nuu.

O le savali a Le Ekalesia a Iesu Keriso o le Au Paia o Aso e Gata Ai e mo tagata uma. O se savali mo le lalolagi atoa e uiga i le alofa o le Atua mo i latou uma o Lana fanau, e uiga i le toefuataiina o le Faa-Kerisiano o le Feagaiga Fou, e uiga i faaaliga, ma tusitusiga paia faaopoopo o loo molimau mai e uiga ia Iesu Keriso. O le Faa-Mamona o se ie taugata lea o le faitau miliona o tagata taitoatasi, mai aganuu eseese ma tautatala i le tele o gagana o le lalolagi. O le tanumiaina o eseesega o faapotopotoga a Mamona, o se autu tutotonu lea ma se manaoga ina ia tasi ma le Atua, faatasi ai ma o tatou uso a tagata o le Au Paia o Aso e Gata Ai, ma faatasi ai ma tuaoi ma uo o isi faatuatuaga.

Style Guide Note:When reporting about The Church of Jesus Christ of Latter-day Saints, please use the complete name of the Church in the first reference. For more information on the use of the name of the Church, go to our online Style Guide.